Rev 4 | GbrGAW | STEP | A Shi mi ɓei shi awye ma gye abokunmi n guya gni n she, mawo begye n mi ɓei shinwo nyi, kwo ɓei wo n gye abye knaknaci yakwo, kwa daɓo n miyi kwa ci ge, “Ɓe ya ma wu ho aɓo nɓa ɓa zhin n na abye.”

Revelation of John 4

Oshe A Bokunmi Nguyagni

1 A Shi mi ɓei shi awye ma gye abokunmi n guya gni n she, mawo begye n mi ɓei shinwo nyi, kwo ɓei wo n gye abye knaknaci yakwo, kwa daɓo n miyi kwa ci ge, “Ɓe ya ma wu ho aɓo nɓa ɓa zhin n na abye.” 2 Nsayi-sayi, mi dna n zafun, n ɓo n eshe ma gye, okwo mwa-mwa, esushikpe-gye n zahoi sasetu nkwo. 3 Ena buzangna yakwo ɓei kun n owo n gye ɓa kun n diamond na bmiya yi, n Shanyin-pmana yi kwoi bmiyana n shewo shinkpegye gun. 4 Esu ashinkpegye a ɓiyi n gun shiba cei anyi n she Esu Shinkpegye dnagmayi gun, n na atukwodai ʼshiba-cei-anyi n sase kpe n ɓa, n na ajei kpe n bui-bui n rawani zinariya nya yi wan n ɓa tukwo. 5 O gma-na bmiya n ogma-wyisai ɓei kun n wo Shinkpegye, a begye ɓei fi n ogmawyisai. Nwo shikpegye abye, afitila n gun tnaba n wan enazhi, ɓa zhin misali Zafun ngun tnaba Shekwoyi anya. 6 N nuwan yakwoyi n wu ngye cristal kwoyi kun n shinkpegye-esu nya. Anya awye-wyeyi n gun anyi n zhi n wo shinkpegye aba, n na aba ngun anyi, ɓai ɓe n na awyei, avun n abye yi. 7 Nya wye-wyeyi kmisunyi ɓei wu ngye gaba, bayi ɓei wu n gye nakwo ɓiyi, tayi ɓei n na awyebai n gye gbagyiza. Nyiyi n wu n gye zunkwo n na abminai laya ngye kwo gye afu. 8 Doho-dohoi n na anya a wye-wyeyi ye n na abminai gyi ngun tnanyi, oɓa abmina atasinya n fuya n na awyei, sukwo n nyipyei ɓai ci ge Gyi-gyi-yi, gyi-gyi-yi, gyi-gyi-yi Dagayi Shekwoyi ikoda, oza n wo ɓei nyi, n wo lo, owoi nu zhin ɓeɓeyi.

9 Esa n na Anya a wye-wyeyi a ga mwa-mwa, latu n godiyai n oza aba nwo tu n esu-shinkpegye, n wo n wye-wyeyi nyalo-nyalo nyi. 10 A tukwoda shiba cei anyi ye, ɓa miya zhi n wo abye ɓa gawo mwa-mwa, wye-wyeida nyalo-nyalo nya ɓa ya oɓa a rawani zhi n wo abye, ɓai kwo anyi ɓai cige. 11 O, Dagayi ho k uncelo ha gwo mwa-mwa n latuyi n ikoyi, gama ohonu na zhin anya vinya. Aɓei zhin ɓa ɓa bwa wye-wyeyi dna n ho ɓeye nu.